बि.स. २०३१ मा मात्र १० वर्षको उमेरमा पञ्चायती शासनविरुद्ध सशस्त्र संघर्षमा आफ्ना पितालाई सहयोग गरेको कारण भारतको बिहार राज्यस्थित सितामढी कारागारमा ५ महिना जेल जीवन बिताउनुपरेको थियो ।

सन् २०३८ मा उनी नेपाली कांग्रेसको विद्यार्थी संगठन नेपाल विद्यार्थी संघ, महोत्तरी जिल्ला कार्यसमितिको कार्यसमिति सदस्य भए, २०४१ मा जिल्ला सचिव र २०४४ देखि २०४८ सम्म जिल्ला सभापति भएर भूमिका निर्वाह गरे । २०४९ देखि २०५१ सम्म जनकपुरस्थित रा.रा.ब क्याम्पसको स्ववियु सभापति समेत बन्न पुगे तथा पछि नेपाल विद्यार्थी संघको केन्द्रीय कार्यसमिति सदस्य पनि बने ।

बि.स. २०५९ मा उनी नेपाली कांग्रेस महोत्तरी जिल्ला कार्यसमितिको सदस्य बने । २०६१ मा पहिलो पटक महाधिवेशन प्रतिनिधिका रूपमा चयन भए । २०६२ देखि २०६६ सम्म नेपाली कांग्रेस महोत्तरीका जिल्ला सचिवका रूपमा कार्य गरे । २०६३ को दोस्रो जनआन्दोलनका क्रममा जिल्ला कार्यवाहक सभापति रही आन्दोलनमा महत्वपूर्ण भूमिका निर्वाह गरे ।

पार्टीका लागि संघर्ष गर्ने क्रममा उनी पटक–पटक सरकारविरोधी आन्दोलनमा पक्राउ परी जम्मा ३ वर्ष ३ महिना कारावास समेत भोग्नुपरेको थियो ।

सन् २०७४ मा नेपाली कांग्रेसले उनलाई प्रतिनिधिसभा सदस्यको उम्मेदवार बनायो, तर लोकतान्त्रिक समाजवादी पार्टीका नेता महन्थ ठाकुरलाई समर्थन गर्ने पार्टीको निर्णयअनुसार उनले उम्मेदवारी फिर्ता लिए ।

उनी हाल नेपाली कांग्रेस महोत्तरी जिल्ला कार्यसमितिका सदस्य तथा केन्द्रीय सूचना, सञ्चार तथा प्रचार विभागका सदस्य हुन् । हालै सन् २०८२ मा गगन थापाको नेतृत्वमा नेपाली कांग्रेसको केन्द्रीय समितिमा निर्विरोध निर्वाचित भएका छन् । र, उनी २०८२ को प्रतिनिधिसभा निर्वाचनमा नेपाली कांग्रेसका तर्फबाट उम्मेदवार रहेका छन् ।

उनी स्वर्गीय गणेश तिवारी नेपालीका सुपुत्र हुन्, जो नेपाली राजनीतिका एक प्रमुख व्यक्तित्व थिए । उनकी माता दाना देवी पनि आफ्नो समयकी सशक्त नेतृ थिइन् ।

स्वर्गीय गणेश तिवारी नेपाली बी.पी. कोइरालाबाट अत्यन्त प्रभावित भई राजनीतिमा प्रवेश गरेका थिए र नेपाली कांग्रेसमार्फत राजा महेन्द्रको पञ्चायती शासनविरुद्ध सशस्त्र आन्दोलनमा महत्वपूर्ण भूमिका निर्वाह गरेका थिए । उनले धेरै वर्षसम्म निस्वार्थ भावनाका साथ पार्टी र समाजको सेवा गरे ।

मधेस आन्दोलनपछि उनले तराई मधेस लोकतान्त्रिक पार्टीमा प्रवेश गरी बि.स. २०६४ मा महोत्तरी निर्वाचन क्षेत्र नं. ३ बाट निर्वाचन जिती संविधानसभा सदस्य बने, जसले नेपालको ऐतिहासिक संविधान निर्माण गर्‍यो । पछि माधवकुमार नेपालको प्रधानमन्त्री कार्यकालमा १९ महिना युवा तथा खेलकुद मन्त्रीका रूपमा कार्य गरे । स्वास्थ्य कारणले सक्रियता कम भएपछि सन् २०१९ मा उनको निधन भयो र राजकीय सम्मानका साथ अन्त्येष्टि गरियो ।

मधेसको एक साधारण किसान परिवारबाट आएको यस परिवारले नेपाली राजनीतिमा उल्लेखनीय योगदान पुर्‍याएको छ । पार्टी र देशप्रति समर्पित यस परिवारले राजनीतिक तथा सामाजिक दायित्वहरू इमानदारी र गरिमाका साथ निर्वाह गरेको छ । जनताको माया र सम्मान उनीहरूको संघर्ष र सेवाभावको सजीव प्रमाण हो ।